സാമ്പത്തിക വിദ​ഗ്ധരുടെ കണക്കുകൾ തെറ്റി; സ്ഥിതി പ്രവചനങ്ങളേക്കാൾ രൂക്ഷം; ജി.ഡി.പി വളർച്ച പതിനൊന്നു വർഷത്തെ ഏറ്റവും താഴ്ന്ന നിരക്കിൽ

ന്യൂദൽഹി: ദേശീയ സ്ഥിതിവിവരക്കണക്ക് ഓഫീസ് വെള്ളിയാഴ്ച്ച പുറത്തുവിട്ട കണക്കുകൾ പ്രകാരം 2019-2020 വർഷത്തെ സാമ്പത്തിക വളർച്ച പതിനൊന്ന് വർഷത്തെ ഏറ്റവും താഴ്ന്ന നിരക്കിൽ. 4.2 ശതമാനമായാണ് ജി.ഡി.പി വളർച്ച കുറഞ്ഞത്.

ഈ വർഷത്തെ അവസാന പാദമായ ജനുവരി-മാർച്ച് മാസത്തിൽ ജി.ഡി.പി വളർച്ച 3.1ശതമാനമായാണ് കുറഞ്ഞത്. ഇത് കൊവിഡ് 19 നെ തുടർന്ന് രാജ്യത്ത് ഏർപ്പെടുത്തിയ ലോക്ക് ഡൗണിന്റെ സ്വാധീനം വ്യക്തമാക്കുന്നതാണ്. മാർച്ച് 25നാണ് രാജ്യത്ത് ലോക്ക് ഡൗൺ ഏർപ്പെടുത്തിയത്.

സാമ്പത്തിക വിദ​ഗ്ധരും റേറ്റിങ്ങ് അനലിസ്റ്റുകളും പ്രവചിച്ചതിനേക്കാൾ ഉയർന്ന നിരക്കിലാണ് ജി.ഡി.പി വളർച്ച കുറഞ്ഞത്. ഉത്പാദന മേഖലയിൽ 1.4 ശതമാനം നെ​ഗറ്റീവ് വളർച്ചയാണ് രേഖപ്പെടുത്തിയത്.

2019-2020 വർഷത്തെ ബജറ്റ് എസ്റ്റിമേറ്റ് ജി.ഡി.പി വളർച്ച 8.5 ശതമാനമായാണ് കണക്കാക്കിയത്. എന്നാൽ കൊവിഡ് പ്രതിസന്ധിയെ തുടർന്ന് നാഷണൽ സ്റ്റാറ്റിസ്റ്റിക്കൽ ഓഫീസിൽ നിന്നുള്ള എസ്റ്റിമേറ്റുകൾ ഇത് 5 ശതമാനമായി കുറച്ച് പരിഷ്കരിച്ചിരുന്നു. എന്നാൽ വെള്ളിയാഴ്ച്ച പുറത്തിറക്കിയ താത്ക്കാലിക എസ്റ്റിമേറ്റിലാണ് ഈ കണക്ക് 4.2 ശതമാനമായി കുറഞ്ഞത്. കഴിഞ്ഞ വർഷം ഇന്ത്യൻ സമ്പദ് വ്യവസ്ഥ 6.1ശതമാനം ഉയർന്നിരുന്നു.

ഡൂള്‍ന്യൂസിനെ ഫേസ്ബുക്ക്, ടെലഗ്രാം, ഹലോ പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക