Тошкентда коронавирусдан тузалганлар сони 1000 нафардан ошди

Соғлиқни сақлаш вазирлиги Тошкент шаҳридаги шифохоналарда яна бир гуруҳ беморлар соғайгани, эндиликда пойтахтда шу вақтгача соғайганлар сони 1000 нафардан ошгани ҳақида маълумот берди. Тошкентдаги шифохоналарда даволаниб чиққанлар орасида Қозоғистон ва Тожикистон фуқаролари ҳам бор.

Бугун Тошкентдаги Вирусология илмий-текшириш институти клиникасида 16 нафар, Эпидемиология, микробиология ва юқумли касалликлар илмий-текшириш институти клиникасида 6 нафар ҳамда Самарқанд вилояти юқумли касалликлар шифохонасида 7 нафар, жами 29 нафар бемор бутунлай соғайди ва реабилитацияга кузатилди.

Вирусология илмий-текшириш институти клиникасида тузалганларнинг 10 нафари  эркак, 6 нафари аёл бўлиб, ёши каттаси 63 ёшда, ёши кичиги 2019 йил туғилган. Ҳудудлар кесимида оладиган бўлсак, Тошкент вилоятидан 5 нафар, Андижон шаҳридан 3 нафар, Хоразм ва Сурхондарё вилоятларидан 2 нафар, Навоий, Фарғона вилоятлари, Тошкент шаҳри ва Қозоғистон Республикасидан 1 нафардан

Эпидемиология, микробиология ва юқумли касалликлар илмий-текшириш институти клиникасидан тузалганларнинг барчаси эркак бўлиб, ёши каттаси 49 ёшда, ёши кичига эса 19 ёшда. Ҳудудлар кесимида оладиган бўлсак, Бухоро, Жиззах, Самарқанд, Фарғона вилоятлари, Тошкент шаҳри ҳамда Тожикистон Республикасидан 1 нафардан. 

Тошкент шаҳрида шу пайтга қадар 997 нафар бемор соғайган бўлса, эндиликда уларнинг сони 1019 нафарга етди.

Самарқандда тузалганларнинг барчаси ушбу (Тойлоқ туманидан 4 нафар, Самарқанд шаҳридан 2 нафар ва Пастдарғом туманидан 1 нафар) вилоятдан. Уларнинг 5 нафари эркак, 2 нафари аёл бўлиб, ёши каттаси 49 ёшда, ёши кичига 2020 йилда туғилган чақалоқ. Вилоятда эндиликда соғайганлар 265 нафарга етди.

Ҳозирга қадар мамлакат бўйлаб коронавирус инфекциясидан бутунлай соғайганлар сони 2723 нафарга етди.