Темур Жўраев, пенальтилар серияси ва совринлар

2007 йилги мавсумда дарвозабон Темур Жўраевнинг қаҳрамонлиги "Пахтакор"нинг иккита совринни қўлга киритишида катта аҳамият касб этган.

Жўраев бир неча пенальтилар сериясидаги қаҳрамонлиги сабабли МДҲ Чемпионлар Кубоги ва Ўзбекистон Кубоги "Пахтакор"га насиб этишида улкан ҳисса қўшган. 2007 йил бошида Москвада ўтказилган МДҲ Чемпионлар Кубогида "Пахтакор" ушбу мусобақада ягона муваффақиятини қайд этган. Темур Жўраев эса икки бор пенальтилар сериясида қаҳрамонга айланган. Чорак финалда Сербиянинг ОФК клубига қарши кечган беллашувда 1:1 ҳисоби қайд этилган. Серияда дарвозабон сербияликлардан Божович ва Пилипович томонидан тепилган тўпларни қайтариб, ярим финалга йўл олинишига ёрдам беради. Финалда эса Латвиянинг "Вентспилс" жамоасига қарши баҳсда у Игнатий Нестеров ўрнига 108-дақиқада майдонга туширилади. Пенальтилар сериясида Зангареев ва Ваненснинг зарбаларидан сўнг тўпни қайтаради. Агар Зангареевнинг зарбаси бартараф этилмаганда ғолиблик Латвия клубига насиб этарди. Ҳал қилувчи зарбани қайтаришдан аввал Жўраевнинг ўзи серияда зарбани аниқ амалга оширади. Бу ғалабада унинг сериядаги қаҳрамонлиги катта ўрин тутган.

2007 йил охирида эса Ўзбекистон Кубоги финалида у яна бир соврин йўлида қаҳрамонлик кўрсатади. "Қурувчи" билан финал 0:0 ҳисобида якунланади. 116-дақиқада яна Нестеров ўрнига туширилган Жўраев ўзидан кутилган ишончларни тўлиқ оқлайди. Рақибдан Ғофуровнинг зарбасини тўсиб олган Темур ҳал қилувчи пенальтини ўзи амалга ошириб, "Пахтакор"нинг Ўзбекистон Кубогини қўлга киритишини таъминлайди. шу тариқа бир йил ичида деярли икки бир хил сценарий ёрдамида "Пахтакор" ўз совринлари сонини 2тага кўпайтиради,
Эслатиб ўтамиз, Темур Жўраев "Пахтакор" дарвозабонлари орасида чемпионат ўйинларида ўйин ўтказиш бўйича 7-ўринни эгаллаб турибди. Чемпионатда 96 баҳсда майдонга тушган ушбу посбон ОЧЛда 21 учрашувда жамоа шарафини ҳимоя қилган.

Манба : pakhtakor.uz