Самарқандда уйда ҳеч ким йўқлигини аввалдан билган шахслар жуда кўп миқдордаги пулларни ўғирлади

Ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан Жиноят кодексининг 169-моддаси 4-қисми “а” банди (жуда кўп миқдордаги ўғирлик) билан жиноят иши қўзғатилган. 

2020 йилнинг 20 май куни 30 ёшли С.С. ва 33 ёшли А.Р. жиноий тил бириктириб, таниши, Самарқанд шаҳар Жомбой кўчасида яшовчи 22 ёшли М.Н.нинг яшаш уйида кўп миқдорда тилла тақинчоқлар ва пуллар борлигини, ушбу мол-мулклар турган жойини ҳамда уй эгаси М.Н. ва унинг оила аъзолари 20 май куни соат 14:00 дан 18:00 га қадар уйида бўлмасликлари тўғрисида маълумотга эга бўлган ҳолда, шу куни соат 15:00да  С.С. фуқаро М.Н.нинг уйига калит танлаш йўли билан ғайриқонуний равишда кирган.

Ўзбекистон Республикаси ИИВ ҳузуридаги Тергов департаменти хабарига кўра, улар 148.440.000 сўмлик турли хилдаги тилла тақинчоқлар ва 3.100 АҚШ доллари нақд пулларни яширин равишда талон-торож қилиб, М.Н.га умумий 179.841.636 сўмлик моддий зарар етказиб, ҳодиса жойидан яширинганлар.

Ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан Жиноят кодексининг 169-моддаси 4-қисми “а” банди (жуда кўп миқдордаги ўғирлик) билан жиноят иши қўзғатилган. А.Р.га тегишли моддалар билан айб эълон қилиниб, “қамоққа олиш” тарзидаги эҳтиёт чораси қўлланилган. С.С.ни қўлга олиш ва терговга келтириш чоралари кўрилмоқда. Дастлабки тергов ҳаракатлари давом эттирилмоқда.

“Ҳурматли фуқаролар, уйингизда моддий бойликларни асраб авайлашингизни, уйингизда ҳеч ким йўқлигидан бошқаларнинг хабари бўлмаслигини таъминлашингизни, дераза ромларига темир панжаралар ўрнатишингизни, эшиклар қулфланганлигига алоҳида эътибор қаратишингизни ҳамда имкон борича қўриқлаш пултларига уланишингизни тавсия қиламиз, зеро ўзингиз йиллар давомида меҳнат қилиб топган пулларингизни осон йўл билан бойлик орттириш пайида бўлган шахслар томонидан ўғирланишига имкон яратиб берманг”, - дейилади хабарда.