ФОТОРEПОРТАЖ: Қувалик миришкорлар

Қува - Фарғона вилоятининг тобора чирой очаётган туманларидан. Қувадаги маҳалла ва қишлоқларда кўркам ижтимоий иншоотлар, янги ишлаб чиқариш ва хизмат кўрсатиш объектлари, савдо мажмуалари, замонавий турар-жойлар қад ростламоқда. Тарихий мажмуалар ободонлаштирилмоқда.
Ҳудудда амалга оширилаётган мазкур ислоҳотлар самарасида қишлоқ хўжалиги тармоқларида, кичик бизнес ва хусусий тадбиркорликда, ижтимоий соҳаларни ривожлантиришда салмоқли натижаларга эришилмоқда.
Аҳоли фаровонлигини таъминлашда, айниқса, томорқачилик ривожига катта эътибор қаратилган. Хусусан, кўплаб оилалар шахсий томорқа хўжаликларида кўчатчилик, қулупнай, гилос, ўрик ва бошқа маҳсулотлар етиштириш билан шуғулланади. Ҳудудда фаолият юритаётган фермер хўжаликлари эса пахта ва дон етиштириш билангина чекланиб қолмай, буғдойдан бўшаган майдонларда турли хил сабзавот етиштирмоқда. Бу ички бозорни сархил ва сифатли маҳсулотлар билан тўлдириш, шунингдек, уларни қайта ишлаш ва экспорт қилиш имкониятини кенгайтирмоқда. Шунингдек, туманда 27 та замонавий музлатгич фаолият кўрсатмоқда.
13 минг гектардан зиёд боғ ва сабзавот етиштириладиган майдонларда қуваликлар бугун ўзининг меҳнатсеварлик, миришкорлик фазилатлари билан юртимиз фаровонлигига муносиб ҳисса қўшмоқда. Хусусан, туманда анорчиликни ривожлантириш ҳамда унинг экспортини йўлга қўйиш борасида намунали иш олиб бориляпти. Айни кунларда эса боғ ва аҳоли томорқаларида гилос пишган бўлиб, ҳалол меҳнатнинг баракали маҳсули ўз харидорларига етказиб берилмоқда.