Шавкат Мирзиёев Сергелидаги мактаблар тажрибасини вилоятларда ҳам қўллашни тавсия қилди

Президент Шавкат Мирзиёев Тошкент шаҳрининг Сергели туманига ташрифи доирасида тумандаги 329-мактаб ўқитувчи ва ўқувчиларга яратилган шароитлар билан ҳам танишди.

Сўнгги уч йилда Сергелида 460та кўп қаватли уй қурилиб, бу ерга 100 мингдан зиёд аҳоли кўчиб келди. Шуни инобатга олган ҳолда, ҳар бири 1680 ўқувчига мўлжалланган 4та янги мактаб қурилмоқда. Улардан иккитаси фойдаланишга топширилган.

Халқ таълими вазирлигидан маълум қилишларича, бу мактаблар – сўнгги йилларда қурилган энг катта қувватга эга мактаблар ҳисобланади ва уларни қуриш жараёнида 2019 йилда ташкил этилган Президент мактаблари тажрибасидан фойдаланилган.

Таътил бошлангунга қадар 329-мактабда шу яқин атрофда яшовчи 1234 нафар ўқувчи таҳсил олди, уларга 65 нафар педагог турли фанлардан билим бериб келди.

Тўрт қаватли мактабда 48та ўқув хонаси мавжуд бўлиб, уларнинг 20 таси фан хонаси, 14 таси бошланғич синф хонаси ва 14 та хорижий тилларни ўқитишга мўлжалланган.

Бундан ташқари, мактабда 15 та маъмурият хонаси, 1 та чақириққа қадар бошланғич тайёргарлик хонаси, 4 та ахборот технологиялари хонаси, 4 та тўгарак хонаси, 3 та кимё, биология, физика лаборатория хоналари, 2 та ўғил ва қиз болалар технология хонаси, 1 та мусиқа хонаси, 1 та кутубхона фаолият юритади.

Ўқувчиларга қулайлик яратиш мақсадида 1 та 40 ўринга мўлжалланган электрон кутубхона, 1 тадан тиббиёт ҳамда тиш шифокори хонаси, 1 та 140 ўринли фаоллар зали, 1 та 200 ўринли ошхона, 2 та спорт зали, футбол, баскетбол, волейбол майдонлари ҳам фаолият юритмоқда.

«Мазкур мактабларда таълим сифатини таъминлаш мақсадида Тошкентдаги энг тажрибали ва билимли мактаб директорлари орасида танлов ўтказилиб, номзодлар Кузатув кенгашлари томонидан танлаб олинди.

Таълим берувчи устозларни танлаб олиш жараёни ҳам холис ва бир неча босқичда ўтказилди. Жорий йилнинг 26-27 февраль кунлари АбдуллаАвлоний номидаги халқ таълими тизими раҳбар ва мутахассис ходимларини қайта тайёрлаш ва малакасини ошириш институтида ташкил этилган 550 нафардан зиёд талабгор — умумтаълим фани ўқитувчилари мутахассислик фанлари, АКТ ва фанни ўқитиш методикаси бўйича онлайн тест синовларида иштирок этди. Синовлар натижасига кўра энг кўп балл тўплаган ўқитувчилар ишга қабул қилинди», – дейилади вазирлик ахборотида.

Давлат раҳбари ташриф чоғида бундай мактаблар тажрибасини кенгроқ қўллаш, вилоятлар, чекка туманларда ҳам жорий этиш бўйича тавсиялар берди.