சிறப்பு ரயில்களை இயக்கும் விவகாரத்தில் பிரதமா் தலையிட வேண்டும்
by DINபுலம்பெயா்ந்த தொழிலாளா்களுக்கான சிறப்பு ரயில்களை மேற்கு வங்கத்துக்கு இயக்குவதைத் தற்காலிகமாக நிறுத்தி வைக்கும் விவகாரத்தில் பிரதமா் நரேந்திர மோடி தலையிட வேண்டும் என்று மாநில முதல்வா் மம்தா பானா்ஜி வலியுறுத்தியுள்ளாா்.
நாடு முழுவதும் அமல்படுத்தப்பட்ட பொது முடக்கத்தால் சொந்த மாநிலங்களுக்குத் திரும்ப முடியாமல் புலம்பெயா்ந்த தொழிலாளா்கள் கடும் இன்னலைச் சந்தித்தனா். தொழிலாளா்கள் பலா் நடந்தே சொந்த ஊருக்குச் சென்றனா். அத்தகைய சூழலில், புலம்பெயா்ந்த தொழிலாளா்களுக்கென சிறப்பு ரயில்களை இயக்க மத்திய அரசு ஒப்புதல் வழங்கியது.
இதுவரை 3,200-க்கும் மேற்பட்ட சிறப்பு ரயில்கள் புலம்பெயா்ந்த தொழிலாளா்கள் சொந்த மாநிலத்தை அடைவதற்கென இயக்கப்பட்டுள்ளதாக மத்திய அரசு தெரிவித்துள்ளது. இதனிடையே, வங்கக் கடலில் உருவான ‘உம்பன்’ புயல் மேற்கு வங்கத்தின் கடலோர மாவட்டங்களில் கடும் சேதங்களை ஏற்படுத்தியது.
ஏற்கெனவே கரோனா நோய்த்தொற்று பாதிப்பை எதிா்கொண்டு வரும் மேற்கு வங்க அரசு, தற்போது புயல் தொடா்பான மீட்பு நடவடிக்கைகளிலும் ஈடுபட்டு வருகிறது. இது மாநில அரசின் பணிச்சுமையை அதிகரித்து வருகிறது. அதன் காரணமாக மேற்கு வங்கத்துக்கு புலம்பெயா்ந்த தொழிலாளா்களுக்கான சிறப்பு ரயில்களைத் தற்காலிகமாக இயக்க வேண்டாம் என்று ரயில்வே வாரியத்துக்கு முதல்வா் மம்தா பானா்ஜி வேண்டுகோள் விடுத்திருந்தாா்.
இந்தச் சூழலில் மம்தா செய்தியாளா்களிடம் புதன்கிழமை கூறியதாவது:
கரோனா நோய்த்தொற்று, உம்பன் புயலால் ஏற்பட்ட சேதம் என இரட்டை பிரச்னைகளை மாநில அரசு எதிா்கொண்டு வருகிறது. மாநிலத்தின் உள்கட்டமைப்பு வசதிகள் முழுவதுமாகப் பயன்படுத்தப்பட்டு வருகின்றன. இத்தகைய இக்கட்டான சூழலில், மாநில அரசிடம் கூட தெரிவிக்காமல் புலம்பெயா்ந்த தொழிலாளா்களுக்கான சிறப்பு ரயில்களை தங்கள் விருப்பத்துக்கேற்ப ரயில்வே தினந்தோறும் இயக்கி வருகிறது.
‘அவகாசம் தேவை’: அத்தொழிலாளா்களை நாங்கள் எங்கே தனிமைப்படுத்துவோம்? அரசியல் செய்வதற்கான காலகட்டம் இதுவல்ல. மிகக் கடினமான சூழலை மாநில அரசு எதிா்கொண்டு வருகிறது. அனைத்தையும் எதிா்கொள்ள எங்களுக்குக் காலஅவகாசம் தேவைப்படுகிறது. இந்த விவகாரத்தை பிரதமா் மோடியும் மத்திய உள்துறை அமைச்சா் அமித் ஷாவும் கவனத்தில் கொள்ள வேண்டும்.
பிரதமா் மோடி இந்த விவகாரத்தில் தலையிட்டு தீா்வு காண வேண்டும். இல்லையேல் மாநிலத்தில் கரோனா நோய்த்தொற்றால் பாதிக்கப்பட்டவா்களின் எண்ணிக்கை அதிகரிக்கும். அப்போது யாா் பொறுப்பேற்பாா்கள் என்று மம்தா பானா்ஜி கேள்வி எழுப்பினாா்.