死敵GEM驚爆與前度閃婚！JW拖12億卓悅太子爺男友行街放閃

入行十年，事業發展不算標青的王灝兒（JW），揀男友就認真識揀，拍拖三年多的卓悅太子爺男友葉韋彤（Tarzan），噸位同家底一樣厚，畀到JW十足安全感兼照顧周到，近年生活富泰逼人的JW，不時同男友Tarzan孖住出遊，新冠肺炎疫情閉關亦可繼續玩樂，在男友豪宅打乒乓波、孖住下廚玩煮飯仔，生活超級寫意，即使工作量激減，一樣無損心情優哉游哉，預習過豪門少奶奶生活。日前突傳出昔日好姊妹鄧紫棋（G.E.M.）跟JW前度Mark秘婚，姊妹當年因仔反目，不過JW現亦有拍拖3年多的有米男友錫晒，日前JW便孖實男友拍拖出巡，約友人歎啡吹水，傾吓食吓Hea足半日，更識做幫男友慳荷包，揀平民食肆貼地拍拖放閃，一樣甜蜜蜜！

撰文、圖片：東方新地

JW被好姊妹硬撬有米前度新歡同樣係富二代

正所謂「舊嘅唔去新嘅唔嚟」！雖然四年前被好姊妹G.E.M.（鄧紫棋）硬撬有米前度Mark Ngai ，事後JW亦表示Mark是由她介紹給G.E.M.認識，從此姊妹反目，不過JW仍大有市場，情路繼續精彩！豁達大方果然有運行，JW同卓悅太子爺葉韋彤（Tarzan）拍拖三年多，感情已轉入直路，JW早已融入男友富貴家庭，經常出席男友家庭及朋友聚會，又跟男友家人一齊入馬場拉頭馬，準新抱地位穩如泰山。

JW貼地拍拖鑽研廚藝做廿四孝女友

年初拍畢電視劇《逆天奇案》，JW便和男友外遊放電，返港不久撞正新冠肺炎疫情爆發，工作量激減，不過閉關的JW仍然節目豐富，事關男友豪宅大到可以放得落乒乓波枱，真係幾時開波都得！她又為男友學下廚及整蛋糕，成功箍實男友個胃。據知情者透露：「JW同男友性格好夾，乜都同聲同氣，知道男友鍾意食嘢，JW陪食連減肥計劃都擱置，疫情唔使開工，佢更加好勤力鑽研廚藝，有時又會同男友一齊下廚增添情趣，又會陪男友出去生意應酬，真係個廿四孝女友！」

閉關多時的JW，日前趁疫情稍放緩，孖男友外出鬆一鬆，雖然男友身家豐厚，不過向來知慳識儉的JW，同男友拍拖去處亦相當貼地，在大坑平民咖啡店歎杯咖啡Hea住同友人傾偈吹水已經好享受，平日出騷高貴充滿女人味，在男友身旁JW即變得豪邁不拘小節，見佢同男友孖實坐在咖啡店外的樓梯，各自玩手機動作一致，非常有默契！

之後Tarzan幾位男友人到來，Tarzan起身同友人圍埋傾男人經，JW即變小女人未有插嘴，自己坐埋一邊繼續睇手機，見男友講得興起， 還不時定神望住男友甜到漏，Hea到夠本，又一行人去食拉麵，JW和男友更十指緊扣拖實行，拍拖幾年仲keep住糖黐豆！呢個卓悅準家嫂，入門冇難度！