《魚缸博客》眾安在線基本面改善且業務想像空間大，現價可吼入！

　　《魚缸博客》「孖屐」目前都係鍾情炒新經濟股，所以最近博客想推薦一隻基本面改善緊同
業務具想像空間嘅眾安在線（０６０６０）比大家！佢為神州嘅互聯網保險科技公司，主要提供
消費金融生態、生活消費生態、汽車及航旅生態、健康生態等五個生態系統佢產品。
　　保險業務方面佢虧損情況明顯好咗，反映集團營運模式可行。截至去年１２月底止全年業績
，集團營業額為１５１﹒２４億銀人仔升５７﹒４巴仙，虧損收窄至４﹒５４億銀人仔，對上一
年同期蝕１７﹒４４億銀人仔。
　　另一方面，博客認為佢嘅虛擬銀行同虛擬保險業務有發展潛力，由於目前疫情流行，傳統銀
行嘅分行縮減服務時間同內容，唔少客戶要改用網上理財，相信長遠市民對網上理財服務的接受
度會提高。再講，傳統銀行嘅手機銀行介面好多都唔太好用，對有科技集團背景的虛擬銀行相信
呢方面一定勁過佢哋！雖然短時間虛擬銀行比較難取代傳統銀行，但只要年輕一代用慣，相信增
加市場份額唔係難事！
　　同埋「孖屐」好現實，Ｄ資金唔鍾意炒銀行呢類增長慢同重資產公司，但好似眾安呢類既有
Ｆｉｎ－ｔｅｃｈ概念，又有傳統銀行嘅資金優勢，但自身又輕資產，相信未來都係資金鍾意繼
續炒作嘅股票！
　　細摩都看好佢，話眾安隨着虛擬銀行及虛擬保險公司先後開業，反映集團目前具備在香江具
備新嘅業務機會。細摩將眾安明年嘅盈利預測上調１９巴仙，相信目前係吸納時機，並調升目標
價至３６銀。
　　最近眾安旗下虛擬保險ＺＡ　Ｉｎｓｕｒｅ推出一隻人壽保險及兩隻危疾保險產品。由於虛
擬保險嘅運作成本較低，節省嘅成本將會給比消費者價格上嘅優惠，相信可以吸引更多消費群！
　　看返公仔圖，佢近半年幾次大跌市都跌唔穿２３﹒５銀呢個水平，相信幾有支持力，博客建
議現價可部署，短線先上望３０銀，穿２３﹒５銀就要走佬！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

新型肺炎專輯 - 最新疫情發展和防疫貼士即睇