‘അഭിമാനമല്ല; എന്‍റെ കടമ’; അച്ഛന് കരൾ പകുത്തു നൽകി അധിൻ
by സ്വന്തം ലേഖകൻകരളിന്റെ കരളേ എന്നൊക്കെ കുഞ്ഞുങ്ങളെ വിളിക്കാത്ത മാതാപിതാക്കൾ കുറവായിരിക്കും. യുവസംവിധായകൻ അധിനെയും അച്ഛനെയും സംബന്ധിച്ചിടത്തോളം ആ വാക്കുകൾ അന്വർത്ഥമായി കഴിഞ്ഞു. കരൾ രോഗബാധിതനായി അവശനിലയിലായിരുന്ന അച്ഛന് തന്റെ കരള്‍ പകുത്തു നല്‍കിയിരിക്കുകയാണ് അധിൻ ഒല്ലൂർ. അധിൻ തന്നെയാണ് സമൂഹമാധ്യമങ്ങളിലൂടെ ഇക്കാര്യം അറിയിച്ചത്. കോഴിക്കോട് ആസ്റ്റര്‍ മിംമ്സിലാണ് ശസ്ത്രക്രിയ നടന്നത്.
അഭിമാനമല്ല, ഭാഗ്യമാണ്, കടമയാണ് എന്ന് അധിൻ കുറിക്കുന്നു. ‘ഇക്കാര്യം നിങ്ങളെ അറിയിക്കാനുള്ള ശരിയായ സമയം ഇതാണ്, എനിക്ക് എന്‍റെ അച്ഛന് കരൾ കൊടുക്കാനുള്ളൊരു ഭാഗ്യമുണ്ടായി. മെയ് 18നായിരുന്നു ശസ്ത്രക്രിയ, ഇപ്പോള്‍ ഞങ്ങള്‍ സുഖമായിരിക്കുന്നു. ഞാനിന്ന് ഡിസ്ചാ‍‍ർജാകും, വൈകാതെ അച്ഛനും. ഞങ്ങൾക്കുവേണ്ടി പ്രാര്‍ത്ഥിച്ച പ്രിയപ്പെട്ട കൂട്ടുകാര്‍ക്ക് നന്ദി. മിംമ്സിലെ ആരോഗ്യപ്രവര്‍ത്തകര്‍ക്കും ഡോക്ടര്‍മാര്‍ക്കും നന്ദി.’ അധിൻ കുറിക്കുന്നു.
പോസ്റ്റര്‍ ഡിസൈനിങിലൂടെയും ഷോര്‍ട്ട് ഫിലിമുകളൊരുക്കിയും പ്രേക്ഷകശ്രദ്ധ നേടിയ അധിന്‍ ആദ്യമായി സംവിധാനം നിര്‍വഹിക്കുന്ന മുഴുനീള ചിത്രമായ പെണ്ണന്വേഷണം ഷൂട്ടിങ് നടന്നുവരികയാണ്. 9090 പ്രൊഡക്‌ഷന്‍സിന്‍റെ ബാനറില്‍ സൈനുല്‍ ആബിദാണ് ചിത്രം നിര്‍മ്മിക്കുന്നത്. അധിൻ തന്നെയാണ് ചിത്രത്തിന്‍റെ തിരക്കഥയും ഒരുക്കിയിരിക്കുന്നത്. കോഴിക്കോട് പശ്ചാത്തലമാക്കിയൊരുങ്ങുന്ന ചിത്രം, പെണ്ണ് അന്വേഷിച്ചു നടക്കുന്ന ഒരു ചെറുപ്പക്കാരന്‍റെ കഥയാണ് പ്രമേയമാക്കിയിരിക്കുന്നത്.