O‘zbekistonda “Vatan o‘g‘loni” harbiy-vatanparvarlik tashkiloti tashkil etish taklif qilindi

Mudofaa vazirligi “O‘zbekiston Respublikasi ‘Vatan o‘g‘loni’ bolalar va o‘smirlar harbiy-vatanparvarlik tashkiloti faoliyatini tashkil etish to‘g‘risida”gi Prezident qarori loyihasini muhokamaga qo‘ydi.

Unga ko‘ra, Mudofaa vazirligi huzurida yuridik shaxs maqomiga ega bo‘lgan “Vatan o‘g‘loni” bolalar va o‘smirlar harbiy-vatanparvarlik tashkilotini tuzish, shuningdek, “Vatan o‘g‘loni” tashkiloti huzurida yuridik shaxs maqomiga ega bo‘lmagan shu nomdagi bolalar va o‘smirlar harbiy-vatanparvarlik tashkilotini rivojlantirish jamg‘armasini tashkil etish to‘g‘risidagi takliflariga rozilik beriladi.

Belgilab qo‘yilishicha:

• Mudofaa vazirligi “Vatan o‘g‘loni” tashkilotining ta’sischisi hisoblanadi;
• O‘zbekistonning “Vatan o‘g‘loni” bolalar va o‘smirlar harbiy-vatanparvarlik tashkiloti o‘z maqomiga, xodimlar (harbiy xizmatchilar) mehnatiga haq to‘lash (pul ta’minoti) shartlariga ko‘ra Mudofaa vazirligi markaziy apparatining mustaqil bo‘limiga tenglashtiriladi;
• “Vatan o‘g‘loni” tashkilotining markaziy apparati va hududiy bo‘linmalari Mudofaa vazirligi qo‘shinlari xodimlarining cheklangan umumiy soni doirasida tashkil etiladi;
• “Vatan o‘g‘loni” tashkilotining markaziy apparati va hududiy bo‘linmalari xodimlarining mehnatiga haq to‘lash Davlat budjeti mablag‘lari hisobidan amalga oshiriladi;
• O‘zbekiston mudofaa vazirining tarbiyaviy va mafkuraviy ishlar bo‘yicha o‘rinbosari “Vatan o‘g‘loni” tashkiloti yetakchisi hisoblanadi;
• “Vatan o‘g‘loni” tashkiloti va uning hududiy bo‘limlarining moddiy-texnik ta’minoti Jamg‘arma mablag‘lari hisobidan amalga oshiriladi;
• “Vatan o‘g‘loni” tashkiloti xodimlari mehnatiga haq to‘lash tartibi va shartlari bo‘yicha davlat boshqaruvi organlari xodimlariga tenglashtiriladi.

“Vatan o‘g‘loni” tashkilotining asosiy vazifalari “Yoshlarga oid davlat siyosati to‘g‘risida”gi qonunni amalga oshirish, o‘sib kelayotgan yosh avlodni ma’naviy-axloqiy va harbiy-vatanparvarlik, bag‘rikenglik, milliy va umuminsoniy qadriyatlar va qonunlarga nisbatan yuksak hurmat ruhida tarbiyalash, ularda mamlakat suvereniteti va mustaqilligini himoya qilish bo‘yicha burch tuyg‘usini shakllantirish, shuningdek, Qurolli Kuchlar safida harbiy xizmatni o‘tash va unga tayyorlash bo‘yicha ijobiy motivatsiyani shakllantirish hisoblanadi.