《飛虎之雷霆極戰》嫌棄咀張曦雯 黃宗澤爆料：原來佢好鹹﹗

30歲女神張曦雯有樣有身材有學識talk得睇得，又搏又貼地又鍾意打機，有邊個唔鍾意？有邊個唔恨咀佢先？偏偏同佢喺無綫新劇《飛虎之雷霆極戰》做一對嘅黃宗澤，講番喺劇中嘅一場難忘咀戲，不但唔想take two，仲爆張曦雯「好鹹」﹗

撰文：東方新地

黃宗澤咀張曦雯怕要重拍

黃宗澤和吳卓羲最近為《飛虎之雷霆極戰》不停宣傳谷收視，日前接受無綫娛樂新聞台訪問，雖然Bosco演嘅角色汪國棟唔夠吳卓羲演嘅章Sir多艷福，不過同Bosco做CP嘅係女神級張曦雯（Kelly），之前仲雙雙去英國拍外景，這些機會……。Bosco喺訪問中被問到跟Kelly有連場咀戲，問到係咪好難忘，點知Bosco衝口而出：「好鹹㖭﹗愈拍愈鹹﹗」主持人立即追問，Bosco才解釋：「錫錫吓鹹鹹哋嘅，原來佢（Kelly）喊到流鼻涕﹗」主持人問冇叫暫停或者要求再拍？Bosco話惟有死撐下去，如果再拍又可能唔止鼻涕，可能會有一粒粒嘢出現，後果會更慘，Bosco笑笑口話：「依家先知佢原來好鹹嘅﹗」

黃宗澤笑馬明係鹹濕仔

Bosco唔止話張曦雯「好鹹」，仲爆舊拍檔馬明變得好鹹濕，Bosco、吳卓羲同馬明呢個組合對上一次合作已是十六年前，主持人問到覺得馬明有乜唔同，Bosco同吳卓羲竟異口同聲話：「鹹濕咗﹗」Bosco笑住話：「會講笑、搞氣氛、口花花、識撩女仔﹗」吳卓羲直指馬明重色輕友：「佢淨係想同苟芸慧合作啫，同我哋就得過且過囉﹗哈哈哈﹗」

傷腳黃宗澤令對手要坐住對打

訪問中又提到黃宗澤拍劇時左腳受傷，要做手術休息十多天後立即歸隊，但因行動不便要坐輪椅，所以不但要坐住扮行路，更要坐住同所有對手對打，Bosco話：「好多謝劇組幫忙，仲有對手，為咗要就坐住輪椅嘅我，要坐住同我對打，而後面嘅人又要就番個高度要全程跪喺度，真係唔好意思﹗」