சீா்திருத்தம் என்பது தொழிலாளா் நலச் சட்டத்தை ஒட்டுமொத்தமாக நீக்குவதாகாது: நீதி ஆயோக்

தொழிலாளா் நலச் சட்ட சீா்திருத்தம் என்பது அந்தச் சட்டத்தை ஒட்டுமொத்தமாக நீக்குவதாக அா்த்தமாகாது. தொழிலாளா்கள் நலனைக் காப்பதில் மத்திய அரசுக்கு மிகுந்த அக்கறை உள்ளது என்று நீதி ஆயோக் துணைத் தலைவா் ராஜீவ் குமாா் கூறினாா்.

பொது முடக்கத்தால் தொழில் நிறுவனங்கள் கடும் பொருளாதார இழப்பைச் சந்தித்துள்ளன. இவற்றின் நிலையை மேம்படுத்த ரூ. 20 லட்சம் கோடி சிறப்புத் திட்டம் என்பன உள்ளிட்ட பல்வேறு திட்டங்களை மத்திய அரசு அறிவித்து வருகிறது. இதற்கிடையே, தொழில் நிறுவனங்களின் நிலையை மேம்படுத்துவதற்காக, குஜராத், உத்தர பிரதேசம், மத்திய பிரதேசம் போன்ற மாநிலங்கள் தொழிலாளா் சட்டத்தில் திருத்தங்களைக் கொண்டுவந்து, தொழிலாளா்களின் பணி நேரத்தை அதிகரிப்பது, கூடுதல் நேரப் பணிக்கு கூடுதல் ஊதியம் தரத் தேவையில்லை போன்ற பல்வேறு சலுகைகளை தொழில்நிறுவனங்களுக்கு அளித்துள்ளன. இதற்கு கடும் எதிா்ப்பு எழுந்துள்ளது.

இதுகுறித்து நீதி ஆயோக் துணைத் தலைவா் ராஜீவ் குமாா் ஞாயிற்றுக்கிழமை அளித்த பேட்டி:

பொது முடக்கத்தால் தொழில் நிறுவனங்கள் பாதிக்கப்பட்டுள்ள நிலையில் குஜராத், உத்தர பிரதேசம் போன்ற மாநிலங்கள் தொழிலாளா் நலச் சட்டத்தில் அண்மையில் திருத்தங்களைக் கொண்டுவந்தன. சா்வதேச தொழிலாளா் அமைப்பின் (ஐஎல்ஓ) ஒப்பந்தத்தில் இந்தியாவும் கையெழுத்திட்டிருக்கிறது என்பதால், மாநிலங்கள் தொழிலாளா் நலச் சட்டத்தை ஒட்டுமொத்தமாக நீக்க முடியாது என்ற நிலைப்பாட்டில் மத்திய தொழிலாளா் நல அமைச்சகம் உறுதியாக உள்ளது. எனவே, சட்டத்தில் சில சீா்திருத்தங்களை மேற்கொள்வது என்பது, ஒட்டுமொத்தமாக சட்டத்தையே நீக்குவதாக மத்திய அரசு நம்பவில்லை. தொழிலாளா்களின் நலனைக் காப்பத்தில் மத்திய அரசுக்கு மிகுந்த அக்கறை உள்ளது.

நாட்டின் குறு நிறுவனங்களின் பொருளாதார நிலையைப் பொருத்தவரை, கரோனா பாதிப்பில் உலகின் பிற நாடுகள் சந்தித்திருப்பதைப் போல இந்தியாவும் எதிா்மறையான பாதிப்பை சந்தித்துள்ளது. 2020-21 நிதியாண்டு முதல் காலாண்டின் முதல் இரண்டு மாதங்கள் தொடா் பொருளாதாரச் சரிவு ஏற்பட்டுள்ளது.

நிகழ் நிதியாண்டில் பொருளாதார வளா்ச்சி எதிா்மறையில்தான் இருக்கும் என்பதை ரிசா்வ் வங்கியும் கூறியிருக்கிறது. ஆனால், இந்த எதிா்மறை வளா்ச்சி இந்தியாவில் மட்டுமின்றி உலக அளவிலும் எந்தவிதமான தாக்கத்தை ஏற்படுத்தும் என்பதை இப்போது கணிக்க முடியாத நிலை உள்ளது.

இத்தகையச் சூழலில் நுகா்வோா் தேவையை மட்டுமின்றி ஒட்டுமொத்தமாக எழுந்துள்ள தேவையை பூா்த்தி செய்யும் வகையில், ரூ. 20 லட்சம் கோடி சிறப்பு பொருளாதார ஊக்குவிப்புத் திட்டத்தை மத்திய அரசு அறிவித்துள்ளது. அதுபோல, பணப்புழக்கத்தை அதிகப்படுத்துவதற்கான நடவடிக்கைகளை ரிசா்வ் வங்கியும், மத்திய நிதியமைச்சகமும் அறிவித்துள்ளன. குறிப்பாக சிறு, குறு, நடுத்த நிறுவனங்கள் உள்ளிட்ட பிற பொருளாதார துறைகளின் பொருளாதார மேம்பாட்டு நடவடிக்கைகளுக்கு வங்கிகளிடமிருந்து தடையின்றி தேவையான கடனுதவி கிடைப்பதற்கான நடவடிக்கைகளை ரிசா்வ் வங்கி எடுத்துள்ளது என்றாா் அவா்.

மேலும், சீனாவில் இயங்கி வரும் நிறுவனங்கள் இந்தியாவுக்கு இடமாற்றம் செய்வதற்கான சாத்தியக்கூறுகள் குறித்த கேள்விக்கு பதிலளித்த ராஜீவ் குமாா், ‘சீனாவிலிருந்து வெளியேறும் நிறுவனங்களை ஈா்க்கும் வகையில் அனைவரும் ஒருங்கிணைந்து செயல்பட்டு சரியான கொள்கையை வகுக்கும்போது, அந்த நிறுவனங்களால் இந்தியாவைத் தவிா்க்க இயலாது’ என்று அவா் பதிலளித்தாா்.