సీఎం రిలీఫ్ పండ్ విరాళాల వివరాలు చెప్పండి : బండి సంజయ్
సీఎం రిలీఫ్ ఫండ్‌కు అందిన మొత్తాన్ని, వాటిని ఎలా ఖర్చుచేశారో వివరాలు తెలపాని బిజెపి రాష్ట్ర అధ్యక్షుడు బండి సంజయ్ డిమాండ్‌ చేశారు. సిఎం కెసిఆర్‌కు, కొడుకు కేటిఆర్‌కు అందిన విరాళాలు మొత్తం ఎంత, విూరు వాటిని ఎలా ఖర్చు పెట్టారు ఆ వివరాలను ప్రజలకు స్పష్టంగా చెప్పాలని బిజెపి రాష్ట్ర అధ్యక్షుడు బండి సంజయ్ డిమాండ్‌ చేశారు. వలస కార్మికుల తరలింపు కోసం, విూరు ఖర్చు పెట్టారని చెపుతున్న డబ్బులు, కేంద్రం ఇచ్చిన విపత్తు నిధి నుంచా లేదా వేరే నిధుల నుండి ఇవి వచ్చాయా అని ప్రశ్నించారు. ఈమేరకు ఆయన సిఎం కెసిఆర్‌కు ఓ బహిరంగ లేఖ రాశారు. కోవిడ్‌ వ్యాధిని ఎదుర్కొవటానికి తెలంగాణ ప్రభుత్వానికి కేంద్రం ఇచ్చిన నిధులను విూరు ఎలా ఖర్చు పెట్టారో వివరిస్తూ శ్వేత పత్రం విడుదల చెయ్యాలని, భారతీయ జనతా పార్టీ తరపున డిమాండ్‌ చేస్తున్నామని సంజయ్ అన్నారు.కేంద్ర ప్రభుత్వం ప్రకటించిన ఆత్మనిర్భర్‌ ప్యాకేజీపై సీఎం కేసీఆర్‌ లేని పోని విమర్శలు చేస్తున్నారని రాష్ట్ర బీజేపీ అధ్యక్షుడు బండి సంజయ్ ఆరోపించారు.