‘Lur eta Amets’ animaziozko filma otsailaren 7an estreinatuko da

Lur eta Amets amona Andereren etxean geldituko dira asteburu pasa. Andereren Baltaxar katuak botereak ditu eta horiei esker, Euskal Historian zehar bidaia bat hasiko dute anai-arrebek. Ipuin moduan hasi zen proiektua, zinemetara salto egitea lortu du hainbat erakunderen elkarlanari esker.

Otsailaren 7an Euskal Herriko zinemetan ikusgai izango da ‘Hau bai abentura! Lur eta Amets’ animaziozko filma. Imanol Zinkunegik eta Joseba Poncek zuzendutako istorio honek Lur eta Amets anai-arrebak ditu protagonista, baita Baltatxak katua eta amona Andere ere.

Lur eta Ametsen gurasoek ezkontza dute asteburuan eta amona Andereren etxean utzi dituzte. Baina Andere ez da amona arrunta... ezta bere katu Baltaxar ere ez. Katuaren botereei esker, bidaia luze batean murgilduko dira, garai desberdinetan abentura gazigozoak bizituz. Honela, historiako sasio desberdinetan aurkituko dituzten gaizkileetatik ihesi, Euskal Herriko historia ezagutzeko aukera izango dugu.

Gaur goizean aurkeztu dute pelikula eta arduradunek esan dutenez «publiko zabalari zuzenduta dago guztiok partekatzen ditugun garai, bazter, pertsona eta emozioak erakusten dituelako». Lantaldeak adierazi duenez, prozesu sakona izan da zinemara salto egin aurretik, Euskal Herriaren historiaren irakurketa egin baitzuten gerora «berreraiki eta eskuragarri jartzeko asmoz».

‘Lur eta Amets’ Ikastolen Elkarteak, Katxiporretak eta Elkar argitaletxeak sortutako proiektua da, hasiera batean liburu eta ipuinetan gorpuztu zena. Gero mahai-joko bat sortu zuten pertsonaia horiekin. Orain, ilustraziotik pantaila handira salto egin dute hainbat hiri eta herritan ikuskizuna eskaini ondoren. Izan ere, Durangoko Azokatik hona Euskal Herria zeharkatu dute «autobus magiko batean».