Sipri៖ការលក់អាវុធក្នុងលោកសម្រាប់ឆ្នាំ ២០១៨ បានកើនឡើងជិត ៥%
by គួច គន្ធារ៉ានៅថ្ងៃចន្ទ ទី០៩ ធ្នូ វិទ្យាស្ថានស្រាវជ្រាវសន្តិភាពអន្តរជាតិស្តុកខុលហៅកាត់ Sipri បានផ្សព្វផ្សាយរបាយការណ៍ឆ្នាំ ២០១៨ ស្តីពីជំនួញអាវុធក្នុងលោក។ តាមរបាយការណ៍ ការលក់អាវុធក្នុងលោកសម្រាប់ឆ្នាំ ២០១៨ មានការកើនឡើងចំនួន ៤,៦% ជាមួយនឹងប្រាក់ចំណូលចំនួន ៤២០ ០០០លានដុល្លារ។ ក្នុងចំណោមឧស្សាហកម្មអាវុធគ្រាក់ៗទាំង ១០០ ក្នុងលោក ឧស្សាហកម្មអាមេរិក រុស្ស៊ី និងអង់គ្លេសបន្តរក្សាចំណាត់ថ្នាក់លេខ ១ លេខ ២ និងលេខ ៣។ តែប្រទេសចិនមិនត្រូវបាន Sipri រាប់បញ្ចូលក្នុងឧស្សាហកម្មអាវុធគ្រាក់ៗទាំង ១០០ ទេ ដោយសារតែគេមិនមានទិន្នន័យគ្រប់គ្រាន់។
សម្រាប់ឆ្នាំ ២០១៨ ឧស្សាហកម្មអាវុធអាមេរិកាំងបានស្រូបយកដល់ទៅ ៥៩% នៃទីផ្សារអាវុធក្នុងលោកជាមួយនឹងប្រាក់ចំណូលចំនួន ២៤៦ ០០០លានដុល្លារ ពោលមានការកើនឡើង ៧,២% បើធៀបនឹងឆ្នាំ ២០១៧។ នាយិកានៃកម្មវិធីអាវុធរបស់វិទ្យាស្ថាន Sipri លោកស្រី Aude Fleurant បានបញ្ជាក់ថា កំណើនខ្ពស់នៃការលក់អាវុធអាមេរិកនេះក៏ដោយសារតែឧស្សាហកម្មអាវុធអាមេរិកាំងទទួលបានប្រយោជន៍ពីយុទ្ធសាស្រ្តរបស់រដ្ឋបាលលោកដូណាល់ ត្រាំដែលចង់ធ្វើទំនើបកម្មវិស័យការពារជាតិដើម្បីប្រឈមទប់នឹងឥទ្ធិពលរបស់ចិន និងប្រទេសរុស្ស៊ី។ រស្ស៊ីដែលបន្តរក្សាចំណាត់ថ្នាក់ទី២ ដូចឆ្នាំ ២០១៧ ដោយមានចំណែកទីផ្សារចំនួន ៨,៦% បន្តដោយអង់គ្លេសដែលមាន ៨,៤% និងប្រទេសបារាំងដែលមាន ៥,៥%។
Almaz-Anteï ជាឧស្សាហកម្មអាវុធរុស្ស៊ីទី១ ដែលស្ថិតនៅចំណាត់ថ្នាក់ទី៩ នៃឧស្សាហកម្មអាវុធគ្រាក់ៗទាំង ១០០ ក្នុងលោកជាមួយនឹងប្រាក់ចំណូល ៩ ៦០០លានដុល្លារសម្រាប់ឆ្នាំ ២០១៨ ពោលកើន ១៨% បើធៀបនឹងឆ្នាំ ២០១៧។ កំណើននេះបានមកពីការលក់ក្នុងស្រុក និងពីការលក់ទៅឲ្យប្រទេសផ្សេង ពិសេសការលក់ប្រព័ន្ធការពារអាកាស S-៤០០។ ដោយឡែក ប្រទេសចិនមិនត្រូវបានវិទ្យាស្ថាន Sipri រាប់បញ្ចូលនៅក្នុងរបាយការណ៍ទេ ដោយសារតែគ្មានទិន្នន័យគ្រប់គ្រាន់។ តែ Sipri យល់ថា ចិនអាចមានឧស្សាហកម្មអាវុធចន្លោះពី ២ ទៅ ៧ ដែលស្ថិតក្នុងចំណោមឧស្សាហកម្មអាវុធគ្រាក់ទាំង ១០០ ក្នុងលោក។ ជារៀងរាល់ឆ្នាំតាំងពីឆ្នាំ ២០១៣ ថវិកាការពារជាតិចិនមានចំនួន ១,៩% នៃផលិតផលសរុបក្នុងស្រុក។
តួកគីក៏ជាប្រទេសដែលឧស្សាហកម្មអាវុធមានសុខភាពល្អដែរ ព្រោះមានមានឧស្សាហកម្មអាវុធចំនួនពីរបានស្ថិតក្នុងឧស្សាហកម្មអាវុធគ្រាក់ៗទាំង ១០០ ក្នុងលោកជាមួយនឹងប្រាក់ចំណូល ២ ៨០០លានដុល្លារសម្រាប់ឆ្នាំ ២០១៨ ពោលកើន ២២% បើធៀបនឹងឆ្នាំ ២០១៧។ តែគេមិនត្រូវភ្លេចនិយាយទេថាតាំងពីឆ្នាំ ២០០៩ Lockheed Martin ជាឧស្សាហកម្មអាវុធអាមេរិកាំងទី១ ក្នុងលោកដែលអត្រាលក់មាន ១១% នៃទីផ្សារអាវុធក្នុងលោក៕
(ព័ត៌មានដកស្រង់ពី AFP)